विश्वेश्वरय्या पब्लिक स्कूलच्या श्री चोरमलेची राज्यस्तरीय वुशू स्पर्धेसाठी निवड

विश्वेश्वरय्या पब्लिक स्कूलच्या श्री चोरमलेची राज्यस्तरीय वुशू स्पर्धेसाठी निवड

लातूर : विभागीय वुशू क्रीडा स्पर्धेत विश्वेश्वरय्या पब्लिक स्कूल, लातूरच्या विद्यार्थ्यांनी उल्लेखनीय यश संपादन करत शाळेच्या क्रीडा परंपरेला आणखी एक मानाचा तुरा जोडला आहे. अंडर-१९ वयोगटातील विविध वजनगटांमध्ये विद्यार्थ्यांनी उत्कृष्ट प्रदर्शन करून पदके पटकावली.

अंडर-१९ मधील ७० किलो वजनगटात श्री चोरमले याने प्रतिस्पर्ध्यांवर मात करत प्रथम क्रमांक मिळवला. या शानदार कामगिरीमुळे त्याची थेट राज्यस्तरीय वुशू क्रीडा स्पर्धेसाठी निवड झाली आहे. तसेच अंडर-१९ मधील ६५ किलो वजनगटात उमर काझी याने द्वितीय क्रमांक प्राप्त करून शाळेच्या यशात मोलाची भर घातली.

स्पर्धेदरम्यान दोन्ही खेळाडूंनी उत्कृष्ट तंत्र, संयम, आत्मविश्वास आणि जिद्दीचे प्रदर्शन करत प्रेक्षक व परीक्षकांची दाद मिळवली. त्यांच्या या यशामुळे विश्वेश्वरय्या पब्लिक स्कूलच्या क्रीडा क्षेत्रातील गुणवत्ता पुन्हा एकदा अधोरेखित झाली आहे.

या यशानिमित्त आयोजित सत्कार समारंभात विजयी विद्यार्थ्यांसह त्यांच्या प्रशिक्षकांचा गौरव करण्यात आला. नगरसेविका राजश्री बाहेती आणि भाजप युवा नेते अंकित बाहेती यांच्या हस्ते विद्यार्थी व प्रशिक्षकांचा विशेष सत्कार करण्यात आला. तसेच प्राचार्य बसवेश्वर धाराशिवे, कॅम्पस डायरेक्टर किशोर जेवे आणि व्यवस्थापकीय संचालक ऋतिक धाराशिवे यांच्या उपस्थितीत खेळाडूंच्या यशाचा गौरव करण्यात आला.

या यशाबद्दल ज्युनिअर कॉलेजचे प्राचार्य अमोल कुंभार, क्रीडा शिक्षक ज्ञानेश्वर हादवे तसेच शिक्षक व पालकांनी विद्यार्थ्यांचे अभिनंदन केले. विद्यार्थ्यांच्या कठोर परिश्रम, नियमित सराव आणि शाळेकडून मिळालेल्या योग्य मार्गदर्शनाचा हा यशस्वी परिणाम असल्याची भावना यावेळी व्यक्त करण्यात आली.

यावेळी संस्थेचे अध्यक्ष शिवचरणजी धाराशिवे, उपाध्यक्ष प्रभाकरजी कापसे तसेच सहसचिव महादेवजी खिचडे यांनी विद्यार्थ्यांच्या उल्लेखनीय कामगिरीचे कौतुक करत राज्यस्तरीय स्पर्धेसाठी निवड झालेल्या श्री चोरमले याला विशेष शुभेच्छा दिल्या. आगामी राज्यस्तरीय स्पर्धेतही त्याने उत्कृष्ट प्रदर्शन करून शाळेचे, पालकांचे आणि लातूर जिल्ह्याचे नाव उज्ज्वल करावे, अशी अपेक्षा व्यक्त करत त्याच्या यशस्वी वाटचालीसाठी शुभेच्छा दिल्या. तसेच उमर काझी याच्या यशाचेही कौतुक करून भविष्यात आणखी मोठी कामगिरी करण्यासाठी त्याला प्रोत्साहन देण्यात आले.

विद्यार्थ्यांच्या या यशामुळे संपूर्ण शाळा परिसरात आनंदाचे वातावरण निर्माण झाले असून, क्रीडा क्षेत्रातही विश्वेश्वरय्या पब्लिक स्कूल सातत्याने उल्लेखनीय कामगिरी करत असल्याचे पुन्हा एकदा सिद्ध झाले आहे.